सुन्दरहरैँचा । मोरङको सुन्दरहरैँचा १० स्थित विराटचौकमा सञ्चालन भइरहेको सुन्दरहरैँचा विराट एक्स्पोमा गाईको गोबरबाट निर्मित पूजा सामग्रीमा अवलोकनकर्ताको ध्यान खिचिएको छ ।
विराटनगर –५ जामुनगाछीमा रहेको उन्नत गोठ प्रालिले एक्स्पोमा गोबरबाट निर्मित पूजा सामग्रीको सानो स्टल राखेको छ । स्टलमा उद्योगका सञ्चालक बेविना दाहालले गाईको गोबरबाट बनेका पूजा सामग्री देखि घरायसी प्रयोगका सामानका बारेमा अवलोकनकर्ताको जिज्ञाषा मेटाइरहनु भएको छ । विराटनगर एक्स्पोमा राम्रो ब्यापार भएपछि दाहालले विराटचौकमा पनि आफ्नो उत्पादनको प्रदर्शनी तथा बिक्री स्टल राख्नु भएको हो । दाहालको उद्योगले गोबरबाट दियो,कलस,विभिन्न प्रकार मुर्ति,फुलहरू,दियो स्टेण्ड,विष्णुका पाउ लगायत सय बढी सामग्री उत्पादन गरिरहेको छ । सस्तो मूल्यमा खरिद गर्न सकिने यि सामग्रीहरू वातावरण मैत्री रहेको दाहालको भनाई छ ।
दूध दिन छाडेका गाईहरूको संरक्षण गरी तिनीहरूले दिने गोबरबाट पूजा सामग्री निर्माण गरिरहेको दाहालले बताउनु भयो । दाहालले हाल दश जना महिलालाई उद्योगमा रोजगार दिइरहनु भएको छ । सुरुवाती चरणमा सात लाख रुपियाँ लगानी गरी उद्योग सञ्चालनमा ल्याउनु भएकी दाहालले विराटनगरमा सञ्चालन भएको एक्स्पोमा आफ्नो उत्पादन पहिलो पटक राख्नु भएको थियो । दाहालले भन्नुभयो – त्यो प्रदर्शनीमा अवलोकनकर्ताको राम्रो साथ पायौं । ब्यापार राम्रो भयो । त्यसपछि विराटचौकमा पनि ल्याएका हौं ।
पहिले कपडा ब्यापार र त्यसपछि बैंकमा जागिरे बन्नु भएकी दाहाल हाल आफै केही गर्नुपर्छ भन्ने धेयले उन्नत गोठ प्रालि सञ्चालन गरिरहनु भएको छ । दाहालले भन्नुभयो – यो उद्योगले घरका कामकाजी आमाहरूलाई काम दिएको छ । दूध दिन छोडेका गाईले खान पाएका छन् । ति गाईको संरक्षण भएको छ । देशैभर रहेका गौशालामा यस्ता उद्योग सञ्चालन गर्न सकिने दाहालले बताउनु भयो । माटोबाट बन्ने सबैखाले सामग्री बनाउन सकिने दाहालको भनाई छ । उहाँले भन्नुभयो –सामानहरू सस्ता छन् ,त्यसैले पनि अवलोकनकर्ताहरू हाम्रो कुरा सुनेपछि केही न केही किनेर जानु हुन्छ । दाहालले उन्नत गोठ उद्योग गोबरबाट निर्माण सामग्री बनाउने नेपालकै पहिलो उद्योग भएको दाबी गर्नुभयो ।
